Vana uirescentis manserunt somnia ueris,
quod calor exsiccans cuncta secutus erat.
Praeteriere dies, quos sol aestusque fouebant:
molliaque autumnus carpere poma iubet.
Et folia arboribus uenti rapuere furentes
et rosa marcescit prataque flore carent.
Iam non sunt uiolae, iam non sunt lilia in horto,
nec mel dulce et olens colligit agmen apum.
Candida delapsis niuibus mox arua tegentur
et gelidum marcens uix feret arbor onus.
Vndecimus mensis cum iam sit paene peractus,
multi non remanent tempore eunte dies:
Mox “Vetus anne, uale!” laeti clamabimus atra
nocte nouumque feres ordine, Iane, tuo.