DE VERBIS NOVANDIS

[ille ego qui]

"Müsli", "Cornflakes"
--------------------

salvete sodales,
quibus verbis haec exprimam: "müsli" et "cornflakes"? dedecet res tam dulces tamque mihi caras nominibus carere Latinis.
neque usquam (ne apud Kluge quidem) invenio scriptum, quod subsit veriloquium voci "müsli" ...
quis mihi succurret?

valete

[consus]

Salve, amice!
Nonne licet dici "cerealia"? Cf. Plin. nat. 23, 1: Peracta cerealium in medendo quoque natura est....

[Medicus domesticus]

Salve ille,

Müsli, n musilo, onis, f {„musilo“ est verbum linguae esperanticae huius cibi}

Inveni in Vocabulario Latinitatis Huius Aetatis:
http://www.lateinlexikon.com/lexicon_la ... iernum.pdf

Vale.

[consus]

musilo, onis, f {„musilo“ est verbum linguae esperanticae huius cibi}

Quo vocabulo lecto vox faucibus mihi haesit...

[Medicus domesticus]

Tibi in mentem venit muris, Conse..
Legionarii Romani et plebs noverant pultem....

[consus]

Forsitan et haec placeant vocabula
far, far cereale, grana cerealia ...

[RM]

"cerealia" non dicam, potius "frumentum pistum conditum".

RM

[ille ego qui]

gratias vobis omnibus ago. complura attulistis, quae mihi placerent

[ille ego qui]

... hoc unum, mi Conse, parum perspicio: "far cereale" ... nonne "far" necesse "cereale" sit?

[consus]

Fateor, amice, adiectivum „cereale“ supervacaneum esse…
In Italia nostra aetate, nisi fallor, cibus ille granosus appellatur “cereali”, qua de causa uti ausus sum Latina voce “cerealia”.

[Zythophilus]

Quin de "pulte Heluetica" loquamur?

[RM]

Quin simpliciter "pulticula" dicimus? Vocabulum Italicum "cereali" autem non "Müsli" sed omne genus frumenti significat.

RM

[consus]

"cerealia" non dicam, potius "frumentum pistum conditum"

Equidem scio te, RM, hominem rei coquinariae esse peritissimum. Quid ergo mirum, si perfecte rem illam granosam descripsisti? Sed tria verba parum apta puto ad usum cottidianum. Exstat et vox "granea": tu quid sentis?

[consus]

Nonne et licet dici: grana fracta vel, si res ex orationis contextu facile perspicitur, omisso participio grana?

[ille ego qui]

id quod dixi: periucunda vos proposuisse mihi persuasi. modo autem quidam amicus etiam aliud verbum proposuit, dico farraginis (pro müsli). nonne hoc quoque satis aptum videtur. cedo, Conse, RM, Tiberis, Zythophile, hoccine quoque verbum vobis placeat ...?