Nugae

[Zythophilus]

En, quod adire licet mihi ab Hercule moenia dicta

tangeturque leui, gaudeo, arena pedi.

Cretica adibuntur Quinctili litora mense

meque salutabit grata taberna frequens.

Regia tecta uagi celsamque uidebimus Idam,

quae genuisse Iouem cognita fama refert,

an stratos calido litus sub sole tenebit

atque ad sola pigris pocula fiet iter?

[consus]

Curetis terra Zythophilum dives habet.
Vadit per artus nunc tremor dirus meos:
Timeo ne taurus capiat Minous ferus
Labyrinthi amicum flexus lustrantem vagos
Ariadna absente. Nescio num sit altera.

[consus]

Est quidam stultus et demens hoc tempore
Rector qui populo praeest grandi et nobili.
Deos hominesque conculcatis legibus
Offendit cupidus imperandi ne sibi
Grex inimicorum mente obsistat libera.
At certe contra gens dicet quondam potens:
Notum est praeire casui superbiam.

[consus]

Rubris vexillis Rheni ripam contegent
Dextram mirantur qui suum Turci ducem
Superbum mente caeca: res est horrida.

[Zythophilus]

Quo tranans liquidas mutatus Iuppiter undas

– fabula nota refert – uenerat, ipse fui,

sed redii interea: loca sum per multa uagatus,

quae generum Solis regem habuisse ferunt.

Haud breue iter faciens et litus et oppida uisi

atque, Ariadna, tui moenia fracta patris.

Tunc petii Dicten non ausus scandere culmen,

quae superat uirides – gens ibi sedula – agros,

quodque Iouis dicunt, intraui in montibus antrum,

sed neque erat diuus nec capra clara domi.

Sole calente mihi zythus non defuit umquam

resinaque merum saepius acre bibi.

[Zythophilus]

Cuncta uehicla refert furari fama Polonos

inque uiis ideo nulla manere diu.

Me mea Posnaniam uexit, me raeda reuexit,

nulli tacta tamen: Quam mala raeda mihi est!

[Zythophilus]

Etsi terribilis nocet – heu! – sonus auribus intus

atque homines cantu magna theatra fugant,

Pegasus in tecto remanet nec membra mouentur,

nam tamen est uolucer fixus aenus equus.

[consus]

Vindobonae passis ater cur Pegasus alis

Se paret in caelum, dic mihi, ferre fugax.

[Zythophilus]

Posnaniae summo signum imposuere theatro

nec mihi nosse licet, sitne ibi causa fugae.

[Zythophilus]

Post mea terga tuum positum est, Copernice, signum.

Instrumenta, caue, ne tua aena cadant!

[Zythophilus]

Esse nihil scribo; dic tu nihil esse remittens

chartam, ut utroque loco norimus esse nihil.

[Zythophilus]

Moenibus in mediis puteus: Scatet unda sonatque

lapsaque sub statuis sese aqua iungit aquae.

Hic tua dirumpit manus, o crinite, leonem

teque tenet quadruplex corpore saxeo Atlans.

Cum sim de puteo signisque locutus et unda,

nonne liquor, quaeris, sit Cerealis. Adest.

[Zythophilus]

Turris dicta nigra indicat fugaces
horas sole diem fouente clarum
et, cum cesseris, alme Phoebe, nocti.
Turrim scandere nobilem fugaces
horae nos uetuere. „Cur?“ requiris.
Tantum temporis esse tum negarunt.

[Zythophilus]

Quam lauat Oceanus, per flores nota uirensque

insula uastata est igne furente diu

nec prope templa, quibus sunt tradita Caesaris ossa

sparsis sistit aquis omnia flamma uorans

deleturque domus, Carolo quae culta fugato est

atque in qua rapuit pallida mors cito eum.

http://www.faz.net/aktuell/gesellschaft ... 87140.html

[marcus03]

Utra facilior exstinctu est: Flammarum illarum fames an sitis nostri Zythophili?

Iterum carmen pulcherrimum composuisti, o rex distichorum invicte!