Nugae

[Zythophilus]

Et pluit et periit nix frigida nec tegit arua

et radiis calidis tristia cuncta carent.

Carmina quem laudant uel somnia uana, precamur

natali Domini copiam adesse niuis.

Vt tegat, optamus, nix montes, oppida, prata

albusque hoc niuibus tempore fiat ager,

uerum celsa niuem retinent iuga culminaque alta,

cum lutea in madidis uallibus arua iacent.

[Tiberis]

Tempora mutantur, caelum mutatur in illis:

frigora mitescunt diffugiuntque nives.

Heu loca quae nivibus careant, non carmen ad illud

conveniunt, homines quod canere usque solent:

"Leniter a caelo nix candida defluit alto.

Frigore stat rigido nocte silente lacus."

Cur querimur? Res ipsa aliquid boni habere videtur:

sunt, qui laetantur deficiente nive.

Gratus pauperibus,quos dira coegit egestas

vivere sub divo, nonne erit ille tepor?

Nec nivem amat, quicumque vehicla viis nive opertis

dirigit in cursu multa pericla timens.

Oderit ille nives, molem removere coactus

qui fuerit dorso saepe dolente suo.

Est ingrata nivis senibus quoque lubrica moles,

lapsus qui timeant fractaque crura magis.

Ergo cur querimur ?Gratum est, quod caela calescunt.

Frigora quisquis amat, ne tamen his careat :

Montanas petito regiones, quae nive abundant :

Sic gaudere suo quisque modo poterit.

[mystica]

.

[Zythophilus]

Inspectura nates lepidas dea uertit ocellos

seque nates dignas iudicat esse Venus.

https://upload.wikimedia.org/wikipedia/ ... les%29.jpg

[mystica]

[medicus]

Ubi invenis has scalas verbis Nasonis inscriptas, Mystica

[marcus03]

cf:
https://en.wikipedia.org/wiki/Felix,_qu ... ere_causas

[medicus]

Salve marce03, non quaesivi quidem catacumbas sed, quo loco Mystica illas scalas invenerit..

[Tiberis]

Marcum paginam Vikipedianam attulisse opinor, ut de auctore illius versus ( scil. Vergilius !) certior fieres...

[Zythophilus]

Vlltima lux anni radio fouet arua calenti,

uerque quasi egelidum uenerit, aura tepet.

Incipietque tuus cras mensis, Iane, Kalendis

et uenient menses ordine deinde suo.

[Tiberis]

Minore multi laetitia fugant
annum exiturum, quod remanet lues

molesta , et incerta novum annum

spe et dubia populus salutat.

Utcumque res anno fuerint novo,
ut spe bona, exopto, teneamini et

feliciter , quodcumque vultis,

semper ut eveniat, sodales.

[Zythophilus]

Heus, nouus annus adest! Ianum saluere iubete,

ut ferat, optantes, nil nisi fausta deus!

Quid dabit incipiens mortalibus annus iensque?

Pestis ut ante furet diffugietne lues?

Vitane reddetur nobis, qualis prius acta est,

ut queat egelido mens bona uere frui?

[cometes]

Ad Medicum: Scalae cum versibus Vergilii in Fonthill Castle in Doylestown (Pennsilvania) inveniuntur.

[Zythophilus]

Nobilitas, ciues, clerus, gens rustica uouit,

dum furor Europen delet agrique flagrant,

haec Matri Mariae sese delubra daturos,

si Maurus patriam non tetigisset atrox.

Egregium fanum struxere silentibus armis,

reddita cum iam pax grata quiesque foret.

https://www.tirol.gv.at/fileadmin/_proc ... 1607d.jpeg

[Zythophilus]

Quod tot sederit in solio regina per annos,

insula gaudebit pocula plena petens.

Nam tribuet spatium caupona bibentibus auctum,

ut sacra sic faciant principe digna sua.

https://www.oe24.at/leute/international ... /504902459