Nugae

[Zythophilus]

Certe est digna suis spumans ceruisia templis

et sacra in his facio mente petita pia.

[Zythophilus]

Abdita sub terra miscet uis uiscera terrae

summaque uti saeui numinis ira mouet.

Fana domusque ruunt, tremefactaque motibus alta

dimittunt homines – currite! – tecta suos.

Sunt fracti lapides, ubi moenia pulchra fuerunt,

est modo puluis, homo, pro statione tua.

Nursia uastata est, Benedicti patria sancti,

inque uiis plenis rudera lapsa iacent.

Vis subita euertit, quae saecula longa crearunt

et fecere manus arsque colenda dedit.

Tecta quibus non sunt, miseris – heu – reddite tecta

et recreate, Itali, fana sacrata Deo.

[ille ego qui]

Nihil omnino de America deque orbis terrarum fatis?

[Sokrates]

.

[Zythophilus]

Ne fieret praeses turpis uir Trumpius, optat

feminaque ostendit pectora nuda furens.

En querere et spera, sed cur horrere uidetur

Trumpius ille tibi pectora nuda furens?

http://bilder.bild.de/fotos-skaliert/zw ... 0.bild.jpg

[Sokrates]

.

[Zythophilus]

Tonsor Vindobonae modo est necatus.
Quo signo liceat malum, requiris,
indagare. Male est uir ille comptus.
http://www.krone.at/oesterreich/mordans ... ory-539488

[consus]

Me salvere iubent aspera denuo
praeruptis salebris culmina montium.
Tempus sed reditus constitui mihi:
Formosae Cypriae Virginis est dies.

[Zythophilus]

Et flauas Vbias memoras et, Conse, columnam,

in mediis Rheni qua fuit insula aquis.

Cum memoretur amor, caupona tacetur et humor:

Quo Gaio Cereris pocula sumpta loco?

[consus]

Non solum placuit veteranis barbara virgo,

Verum etiam zythum quod parat alma Ceres.

Non ego - di melius! - neglexi te, dea dives:

Dicere non possum quot loca in urbe tibi.

[Zythophilus]

En, tot, laeta, tibi, Colonia, esse
cauponas uideo petique siccis
potatoribus, ut putem bibisse
Romanos Vbiosque iam benignae
humorem Cereris locis iisdem,
cum Rheni uetus unda praeteribat
hos et – quid faceret? – fluens sonabat.

[Zythophilus]

Ius, mores, artem prius, aurea Roma, dedisti,

sed nunc quisquilias mittere, Roma, paras.

http://diepresse.com/home/wirtschaft/ec ... Osterreich

[Zythophilus]

Te, Francisce ferunt natalem egisse modestum

pauperibusque hodie te tribuisse cibos.

Quae data iis est daps? Vir ut es tam, papa, modestus,

appositus durus panis aquaeque calix.

[Zythophilus]

Quid petunt a te cupiuntque cuncti?
Leue caupo flagitat aes, Alesi,
cum cibos latos memorat tibi omnes

poculaque addit.

Et uidens cunctas numerat lagoenas
resque mercatrix alias emendas,
ut tibi facta ratione nummos

auferat obstans.

Sperat a te dona puella cara
uultque magnum deficiente munus
iam crumina. Ducere uis amica

uasa, sed aes deest

[Zythophilus]

Adueniuntque dies et Christo festa dicata

inque uiis fulget stella modique sonant.

Pro requiete tenet iam non sacer omnia clamor;

huc, illuc homines et properant et emunt.

Abstineo turbis, fora uito, sed mihi dono

munera, cum duco pocula grata silens.