Nugae

[Christophorus]

id etiam facile solvi potest, si indice muris photographia tangitur

[Exinterator]

fortasse ille nunc tranquillus in litore apricatur poccillum pinae coladae in manu tenens, sed fieri etiam potest ut mortuus sit

[Exinterator]

Poeta noster gaudet fecunda insula
Cui Lusitani Materiae nomen vagi
Olim dedere. Terra qua circumflua
Calypso Ulixem quondam excepit naufragum.

gratulor

[medicus]

Estne nomen illius insulae Ogygia, quae insula mortuorum vocata est?
https://de.wikipedia.org/wiki/Ogygia_(Insel)

[consus]

Cum versus scriberem, o Medice, secutus sum Arthurum Breusing virum artis nauticae peritissimum, qui insulam Materiam sive, ut voce Lusitana utar, Madeira putat esse insulam Ogygiam ubi Laertiades septem annos apud Calypso nympham moratus est.

[Zythophilus]

Consus, ubi uerser, nouit, nam non fugit ulla

res, modo qui sapiens scit loca cuncta, uirum.

Aequor ubi uastum est, haec ora fuisse Calypsus

fertur. Si fuerat, iam puto abisse deam.

Vulpius hic non est, neque ubi sit, nouimus, iste.

Cur tacet ante loquax? Nec sine uoce placet.

[Zythophilus]

Caesaris effigies Caroli prope triste sepulcrum

stat templumque tenet mortua membra uetus.

Crudeli expulerat bello Austria uicta regentes,

a quibus imperio recta erat ante potens,

atque a Pannoniis erat illa corona negata,

quam sibi crediderat rex merito esse datam.

Exilium fit ei mediis sita in aequoris undis

insula morsque uenit uere rapitque uirum.

[Exinterator]

forsitan aliqua de causa retentus quin nugas scriberet ipse sapientior evasit

[medicus]

@exinterator: Thomas Vulpius noster googelendo perfacile est inventu

[Exinterator]

fortasse nostrorum taedio confectus aliud forum infestat

[Zythophilus]

Quod scitis fuit ante Lusitanis,
an nunc sit, dubito, mare, ut uidetur.
http://www.netsearch.pt/fotos/foto_881_3.jpg

[consus]

Est Erdoganus ut videtis dux atrox
Et trux tyrannus: delet iuris ordinem
Removendos esse rectos censens iudices.

[Zythophilus]

Insula linquetur mihi cras formosa "Vale!"que

"Tene iterum", dicam, "sorte sinente petam?"

Sunt montes uirides, flores, sunt oppida, uici,

litora, quae uemens aequoris unda lauat.

Hic etiam coquitur ceruisia, quae queat, ut sic

dicam, si careant labra liquore, bibi.

[Tiberis]

Est Erdoganus ut videtis dux atrox
Et trux tyrannus: delet iuris ordinem
Removendos esse rectos censens iudices.

recte mones. miror tamen, quod Europae,
humana cui curae esse iura dicuntur,
dignus videtur praeses iste Turcorum,
cum quo advenarum res molesta tractetur.

[consus]

... miror tamen ...

Noli mirari, Thybris! Nota sunt verba haec tibi:
Honesta quaedam scelera successus facit.
In Senecae Phaedra* scripta sunt vatis probi.
___
* 598.