Nugae

[Zythophilus]

Cracouiae populum bacchari saepe putaui

in plateis Anglos nocte uiisque queri.

Cur multos, miror, calices clamore sequente

non pellat timidas ebria turba feras.

http://www.compresspr.at/node/296331

[durgicola]

super rege dacoromanorum

Quid Matthaee animum tibi conciliare Marini

Temptas nullis non artibus atque modis?

An quia rex ille est Dacorum? nil mihi curae est

Iste malam in pestem praeproperanter eat

[SursumDeorsum]

Lucra Valentini mercator nomine confert:

Recte! Quidquid habet, credula turba parat.

[Zythophilus]

Dona Valentinum largitum fabula narrat.

Munera sunt etiam ficta, puella, mihi.

[SursumDeorsum]

Hoc, attende, die, ne sis exclusus amator,

Hedychra cum Tyria veste, monile feras!

Ianua enim donis cum cunno aperitur amicae:

Qui dabit, intrabit lege, puella, tua.

[Zythophilus]

Retibus innumeros pisces gens captat Eoa,

quorum cruda homines membra libenter edunt.

[Zythophilus]

Et cras sicca dies scurrarum sacra sequetur

et rediens tempus lux sine carne feret.

[Zythophilus]

Vi caput abscidit foedum Gorgonis atrocis

Perseus et breuior facta Medusa perit.

Sic colubrina coma est miserae turbata Medusae:

Comere serpentes irritus arte labor!

[Zythophilus]

Francisco imperii data ubi sunt sceptra Iosepho,

dum trux Vindobonae tecta tumultus habet,

uersor, et, ut mos est, Musarum tecta requiro

Melpomenesque domus magnaque templa Dei.

En, iocor! Ars taceat! Cauponam cogit alacres

nos, ubi sit Cereris potus, adire sitis.

[Zythophilus]

Credite me petere haec umquam loca nolle remota;
insulam enim totam stercus olere puto.
http://whenonearth.net/wp-content/uploa ... n-woe3.jpg

[Zythophilus]

Pratis in mediis custos erat Argus et Io

pascebatque uigil femineam ille bouem,

cum rapere hanc ira commoto ab patre deorum

iussus Atlantiades tristia pabula adit.

Hic sermone domat, domat hic et harundine monstrum

et superat centum lumina uiua sopor.

Atque ubi membra graui sunt mersa immania somno

centiplicique quies lumina nocte tegit,

iussa paterna sequens Argi caput ense cubantis

demit Mercurius. Libera uacca fugit.

Si tibi bos data pascenda est, et uerba benigna

falsa puta et calamum spargere crede dolum.

[Zythophilus]

Haec sint sparsa licet, Romana habet Austria saxa:

Ostendit ueterem tessera pulchra domum.

http://austria-forum.org/attach/Wissens ... ntor_k.jpg

[Tiberis]

Caesaris esse parem , quia fortis sit sapiensque,

qui regit imperium, turba Casaccha putat.

effigiem faciunt Romano more. Putinus

nonne habitu Divi Iulius alter erit?

[Zythophilus]

Bubo, qui faciebat incitato
humana in capita impetus uolatu,
postremo capitur. Requiris, illum
quae commouerit ira, sed uolucrem
causam non reor esse proditurum.
http://www.spiegel.de/panorama/niederla ... 23523.html

[Zythophilus]

In gelida cista nostra est exhausta lagoena:

Haec, si non sities, certe erit apta tibi.